Wika Tungo Sa Tuwid Na Daan Essays


Wika: Susi sa Pambansang Kaunlaran

Ni: Carl Joseph Lanada

 

Ako ay Pilipino. Nabubuhay sa lupang tinaguriang Perlas ng Silangan… at nakikipagugnayan sa mundo sa pamamagitan ng wika. Sa mga hurado at sa mga naririto ngayon, ngalan ko’y___________ At hiling ko’y makinig kayo sa mga sasabihin ko.

 

Wika… ang siyang nag iisang instrumento upang maiugnay ang mga mamamayan ng bansa upang magkaroon ng malakihang pagbabago tungo sa matuwid na daan. ito din ang nag iisang bagay upang mag kaunawaan ang mga tao sa mundo… at nag iisang sandata upang magkaisa ang mga mamamayan laban sa mga suliranin ng bansa.Marami ang nagagawa ang Wika upang mapabago ang kalagayan ng nasyon. Mula sa umpisa hanggang sa katapusan… ito ang bagay na kailanman ay hindi mawawala sa mundo.. isang susi nakapag ginamit ng mabuti ay magsisilbing isang kayamanan ng bansa tungo sa kaunlaran.

 

Kung ang mga taong mababait ay walang boses o wika sa lipunan… tiyak ay patuloy nadadami ang mga masasamang loob na walang humpay sa paggawa ng hindi magagandang bagay sa bansa. Hanggat walang nagsasalita upang pumuna, tiyak ay patuloy ang saya ng mga demonyo sa bayan. Sa pamamagitan ng wika, nagkakaroon ng lakas ng loob ang mga anghel sa paligid upang isigaw at ipadinig sa lahat ang kanilang mga nakikita nang sa gayon ay magkaroon ng isang matinding paghuhusga na siyang magdadala upang makagawa ng mga batas na siyang magbibigay ng kaparusahan sa kung sino man ang lalabag sa mga ito… kung gayon… ang Wika natin ay nagsisilbing instrumento ng Katarungan at Kapayapaan ng bansa.

 

Sundan pa natin ang mga eksena… Kung may mga demonyo ay tiyak na may mga buwaya din sa lipunan na walang habas na gumagastos ng malaki para sa sariling kapakanan na ginagamit ang dugo at pawis ng mga mamamayan. Kung walang maglalakas loob na magsalita upang sabihin kung sino sila, walang duda na tuloy tuloy lang ang paglaki ng kanilang mga tiyan. Ang resulta, yumayaman sila, naghihirap ang bansa. Ngunit sa pamamagitan ng wika at katapatan ay nagkakaroon ng lakas ang loobang mga tinaguriang WhistleBlowers upang ituro ang mga taong sangkot sa pagkamkam sa kaban ng bayan. Nang dahil sa kanila, ang ilan sa mga malalaking buwaya ng lipunan ay nailagay na rin sa wakas sa koral. Kung gayon… ang Wika natin ang ay nagsisilbing instrumento laban sa Katiwalian ng bansa.

 

Mahalaga ang edukasyon sa isang tao… at kabilang sa asignaturang itinuturo ay ang wika. Kung walang wikang itinuturo sa lahat ng paaralan, tiyak na walang maiintindihan ang mga estudyante sa paaralan… ang resulta, mababang marka, kulang sa galling, kawalan ng trabaho na hahantong sa kahirapan ng tao… na hahantong sa kahirapan ngbansa. Anang saklap naman ng buhay kapag ganon.. dahil dito, Kailangang kailangan na magkaintindihan ng mga Guro at Estudyante nang sa gayon ay pumasok sa kanilang mga isip ang mga impormasyon na magagamit nila sa kanilang kinabukasan. Kapag sa oras na maganda ang resulta, uunlad ang tao at di kalaunan ay uunlad din ang bansa. Tandaan, ang susi upang maka alpas sa bangin ng kahirapan ay ang kaalaman sa mga bagay bagay… kung gayon… ang Wika sa katawan ng Karunungan ay siyang sandata laban sa Kahirapan ng bansa.

 

Mahalaga din ang nagagawa ng wika sa larangan ng ekonomiya. Isipin mo nalang kung walang wika ang isang bansa… tiyak ay walang humpay na magkakakanya kanya ang lahat ng industriya , resulta ng isang malawakang kompetisyon na hindi masyadong maganda sa ekonomiya ng bayan. Kung wala ring wikang alam ang isang bansa, tiyak ay wala ring mga dayuhan na mamumuhunan sa bansa dahil wala tayong instrumento upang makipag ugnayan sa kanila. Nang dahil sa wika, nakakagawa ng mga unyon ang mga magkakatulad na industriya nang sa gayon ay magkaroon ng isang malakihang paglago ng ekonomiya at empleyo sa nasyon. Kung gayon… ang wika sa katawan ng Komunikasyon ay susi sa Mabilisan, Inklusibo, at Sustenidong Kaunlaran ng bansa.

 

Huwag din nating kakalimutan na sa pagharap sa mga suliranin at pag unlad ng bansa ay dapat din nating pahalagahan ang mga lugar kung saan tayo kumukuha ng mga materyales at pagkain… ang ating Inang Kalikasan. Isipin mo nalang ulit kung walang wikang gagamitin ang mga tao upang sawayin ang ibang mga nilalang na walang ka abog abog na naninira sa kalikasan. Tiyak ang mga kristal na tubig sa mga ilog ay magmimistulang daanan na ng mga basura, ang mga dating bundok ay siguradong patag at mga Subdivision na, ang mga malalagong gubat ay tiyak na magiging disyerto. Ang resulta, Malalakas na bagyo, Landslide, at kung ano ano pang mga sakunang gawa ng Kalikasan. Buti nalang at nang dahil sa wika ay unti unti nang maibabalik sa dati ang mga patay na ilog, nagiging luntian ang mga kalbong bundok, nagiging kontrolado na ang bilang ng pagmimina at pagtrotroso at naiiwasan ang paggamit ng kung ano anong mga bagay na tiyak na makakapanira sa kailkasan. Kung gayon, ang wika ay siyang nagiging kalasag upang lubos na mapangalagaan ang Kapaligiran ng bansa.

 

Wika, Wika Wika, Andami ng nagagawa ng wika na siyang pagkakakilanlan ng ating bayan.Tunay nga na ito ay mahalaga upang umarangkada sa pag unlad ang isang bansa. kung wala ito,magmimistula tayong isang jip na umaandar ng paatras. Mas maigi na lalopa nating linangin ang ating wika dahil ang Wika natin ay siyang ating Daang matuwid tungo sa kaayusan at kaunlaran ng bansa.Ako ay Pilipino. Nabubuhay sa lupang tinaguriang Perlas ng Silangan… at nakikipagugnayan sa mundo sa pamamagitan ng wika. At ang wikang gamit ko ay ang wikang Filipino! Sa mga hurado at sa mga naririto ngayon, isang mapagpalang araw sa inyong lahat!


© Copyright 2018 Carl Joseph Lanada. All rights reserved.

 

Pinangungunahan ng Komisyon sa Wikang Filipino (KWF) ang temang Wika Natin ang Daang Matuwid para sa taunang pagdiriwang ng Buwan ng Wikang Pambansa sa Agosto, alinsunod sa Pampanguluhang Proklamasyon Blg. 1041, s. 1997.

Kinapapalooban ng tema sa taóng ito ang kapangyarihan ng wikang Filipino na tumatagos sa iba’t ibang sektor ng lipunan at sa lahat ng uri ng pamumuhay. Nananalig ang KWF na sa kabila ng pagkakaiba-iba ay nagkakaisa tayo dahil sa wikang Filipino ang tinig ng ating kultura, kasaysayan at pagkatao. Dahil sa ating pagkakabuklod, ito ang isa sa mga kasangkapan tungo sa bisyon ng matuwid na daan ng dangal at kaunlaran.

Hinati din ang pangkalahatang tema sa taóng ito sa sumusunod na diwa ayon sa medium term plan ng KWF:

  • ANG WIKA NATIN AY WIKA NG KATARUNGAN AT KAPAYAPAAN
  • ANG WIKA NATIN AY LABAN SA KATIWALIAN
  • ANG WIKA NATIN AY SANDATA LABAN SA KAHIRAPAN
  • ANG WIKA NATIN AY WIKA NG MABILISAN, INKLUSIBO AT SUSTENIDONG KAUNLARAN
  • ANG WIKA NATIN AY WIKA SA PANGANGALAGA SA KALIGIRAN

Hinihikayat ang madla na aktibong makilahok sa mga programang inihanda para sa taóng ito. Pinakatampok sa Buwan ng Wika ang Pambansang Kongreso sa Wika na gaganapin sa Agosto 19-21, 2013. Ang kongreso ay inaasahang daluhan ng mga dalubhasa sa iba’t ibang larang upang talakayin ang mga napapanahong isyung kinakaharap ng wikang Filipino at mga kapatid na wika nito sa bansa. Nagtipon din ng mga programa at proyekto ang KWF para sa pagdiriwang sa taóng ito sa paglulunsad ng opisyal na Pambansang Programa, mula sa iba’t ibang mga pamantasan sa buong Filipinas. Kasama na rin sa hanay ng mga programa ang timpalak sa pagsulat na Gawad KWF sa Sanaysay at ang parangal sa Dangal ng Wikang Filipino na kapuwa taon-taong nagpupugay sa mga indibidwal na nag-ambag para sa pagyabong ng wikang Filipino.

Ang KWF ang natatanging ahensiyang pangwika sa ilalim ng Tanggapan ng Pangulo ng Filipinas. Itinatag sa pamamagitan ng Batas Republika Blg. 7104 ng 1991, inaatasan itong “tiyakin at itaguyod ang ebolusyon, pagpapaunlad at pagpapayaman pa ng Filipino na wikang pambansa ng Filipinas, batay sa umiiral na mga wika ng Filipinas at iba pang wika.”

 

panitikan

Comments

Leave a Reply

Your email address will not be published. Required fields are marked *